धादिङको गजुरी गाउँपालिकामा दुर्घटना हुदा आठको मृत्यु , सोह्र जना घाईते

धादिङ ६ भदौ

धादिङको गजुरी गाउँपालिका वडा नम्बर –२ स्थित चालीसे झरना नजिकै दुर्घटना भएको छ ।

काठमाडौंबाट पोखरा जाँदै गरेको बस आज बिहान त्रिशुलीमा खसेर दुर्घटना भएको जिल्ला प्रहरी कार्यालय धादिङले जनाएको छ ।

दुर्घटनामा परी ८ जनाको मृत्यु भएको जिल्ला प्रहरी कार्यालय धादिङका प्रवक्ता एवम् प्रहरी नायब उपरीक्षक(डीएसपी) सन्तु जैसवालले जानकारी दिनुभयो ।

दुर्घटनास्थलबाट २४ जनाको उद्धार गरिएकोमा १६ जना घाईते छन् ।

घाईतेमध्ये २ जनाको धादिङकै राजमार्ग अस्पताल र १४ जनालाई थप उपचार गर्न काठमाडौं पठाईएको जिल्ला प्रहरी कार्यालय धादिङका प्रवक्ता एवम् प्रहरी नायब उपरीक्षक(डीएसपी) जैसवालले जानकारी दिनुभयो ।

मृतकमध्ये २ जना महिला र ६ जना पुरूष रहेका छन् । मृत्यु भएकाहरूको नाम खुलिसकेको छैन ।

काठमाडौंबाट पोखरा हुँदै म्याग्दी सदरमुकाम बेनी जाँदै गरेको प्रदेश ३–०१–००५ ख ९९५२ नम्बरको बस आज बिहान सवा ११ बजे दुर्घटनामा परेको हो ।

बस बिहान ७ बजे काठमाडौंबाट छुटेको थियो । गाडीमा कति यात्रु थिए भन्ने खुलेको छैन । गाडीका चालक तथा सहचालकको अवस्था पनि थाहा नभएको डीएसपी जयसवालले जानकारी दिनुभयो।