नेशनल माइक्रोफाइनान्स लघुवित्त वित्तिय संस्थाको नवौँ साधारणसभा सम्पन्नः८ करोड ८० लाख बराबरको बोनश शेयर वितरण गर्ने

धादिङ १५ बैशाख
नेशनल माइक्रोफाइनान्स लघुवित्त वित्तिय संस्था लिमिटेडको शुक्रवार धादिङबेशीस्थित क्रिक रिसोर्टमा नवौँ साधारणसभा सम्पन्न भएकोे छ ।

सञ्चालक समितिका अध्यक्ष केशव प्रसाद आचार्यको अध्यक्षतामा भएको साधारण सभामा बिभिन्न जिल्लामा रहेको शाखा सञ्चालक, शाखा प्रमुख तथा लघुवित्त ऋणी लगायतको उपस्थिति रहेको थियो ।

कार्यक्रममा आफ्नो भनाई राख्दै नेशनल माइक्रोफाइनान्सका सञ्चालक समिति अध्यक्ष आचार्यले लघुवित्त माथिको वित्तीय अराजकता बन्द गर्न आग्रह गर्नुभएको छ । उहाँले लघुवित्त माथि अहिले ठुला व्यवसायीले उचालेको भरमा आन्दोलन भएको भन्दै हल्लाको पछाडि नलाग्न लघुवित्त ऋणीलाई अनुरोध गर्नुभयो ।

कम्पनीले आर्थिक वर्ष २०७८÷०७९ को मुनाफाबाट हाल कायम चुक्ता पूँजीको १५ प्रतिशतले हुन आउने ८ करोड ८० लाख १ हजार २४६ रुपैयाँ बराबरको बोनश शेयर लाभांश वितरण गर्ने प्रस्ताव सभाले पारित गरेको छ । बोनस शेयर पश्चात कम्पनीको चुक्ता शेयर पूँजी ६७ करोड ४६ लाख ७६ हजार पुगेको छ ।

सभाले संचालक समितिको तर्फबाट अध्यक्षद्वारा प्रस्तुत हुने आर्थिक वर्ष २०७८÷०७९ को वार्षिक प्रतिवेदन उपर छलफल, लेखापरीक्षकको प्रतिवेदन सहितको २०७९ आषाढ मसान्तको वासलात, आर्थिक वर्ष २०७८÷०७९ को नाफा नोक्सान हिसाब तथा नगद प्रवाह विवरण सहितको वित्तीय विवरणहरु अनुसूचीहरु तथा आर्थिक वर्ष २०७८÷०७९ को लेखापरिक्षण गर्न लेखापरिक्षक नियुक्ति एवम निजको पारिश्रमिक निर्धारण समेत छलफल गरी पारित गरेको छ ।

कम्पनीले हालसम्म रू.११ अर्व ४२ करोड ७ लाख कर्जा लगानी गरी रू. ३ अर्ब २४ करोड ६३ लाख ग्राहक सदस्यहरुबाट बचत संकलन गरेको छ ।

कम्पनीमा हाल देशभर ७८ हजार ७४२ जना ऋणी संख्या रहेका कम्पनी हाल देशका ७ वटै प्रदेशको ६४ वटा जिल्लाहरुमा रहेका १०१ शाखा कार्यालयहरु मार्फत करीब १ लाख ५० हजार ग्राहकलाई लघुवित्त सेवा प्रदान गर्दै आएको छ ।