धादिङको सलाङघाटमा बस दुर्घटना हुँदा ६ जना घाइते

धादिङ २० माघ

धादिङको बेनिघाट रोराङ गाउँपालिका–३ सलाङघाटमा शुक्रवार बिहान बस पल्टिँदा बसमा सवार ६ जना यात्रु घाइते भएका हुन् । घाइते भएका मध्य बर्दियाको बार बर्दिया नगरपालिका–५ बस्ने २० वर्षीय सुरज तिमल्सिना, नवलपरासीको कावासोती नगरपालिका–२ सरस्वती चोक बस्ने ४० बर्षीया लक्ष्मी पाण्डे र सल्यानको बुङकोट नगरपालिका ७ बस्ने २१ वर्षीय सुरज विश्वकर्माको अवस्था गम्भीर रहेको छ ।

गम्भीर घाइतेहरूलाई उपचारको लागि काठमाडौँ ल्याइएको छ । बाँकी घाइतेको राजमार्ग अस्पताल मलेखुमा उपचार भइरहेको छ । उनीहरूको अवस्था भने सामान्य रहेको छ । नेपालगन्जबाट काठमाडौँतर्फ आउँदै गरेको ना ६ ख ४०५ नम्बरको बस अनियन्त्रित भई शुक्रवार बिहान सवा ७ बजे सडकमै पल्टिएको इलाका प्रहरी कार्यालय बेनिघाटले जनाएको छ । बस चालकलाई प्रहरीले नियन्त्रणमा लिएको छ ।