गठबन्धन पक्षबाट अवान्छित कार्य भएको भन्दै गोरखामा पुनः मतदान गर्न एमालेको माग

नेपाल कम्युनिष्ट पार्टी(एमाले) जिल्ला कमिटी गोरखाले गोरखाको निर्वाचन क्षेत्र १ र २ मा पुनः मतदान गर्न निर्वाचन आयोगको ध्यानाकर्षण गरेको छ ।

जिल्ला कमिटीले आइतबार भएको निर्वाचनमा गठबन्धन पक्षबाट अवान्छित क्रियाकलाप गरेको भन्दै यस्तो माग गरेको हो। मतदान केन्द्रमा मृतक,अनुपस्थित मतदाताहरूको नामबाट मतदान गरेको एमाले जिल्ला कमिटीको आरोप छ।

‘मतदान केन्द्रमा भएका निर्वाचन विरोधी क्रियाकलापको घोर भर्त्सना गर्दै उक्त क्रियाकलापप्रति नेकपा एमाले गोरखा असहमति जाहेर गर्दछ’,विज्ञप्तिमा भनिएको छ,‘उक्त घटनाहरूको निष्पक्ष छानबिन गरि पुन निर्वाचन गर्न आयोगको ध्यानाकर्षण समेत गर्दछौँ।’