१६ औँ शिक्षक नायक एवं २४ औँ जुनियर तथा युवा रेडक्रस गोष्ठी धादिङको गजुरी–८ परवाङमा सुरु

धदिङ ०४ कार्तिक
धादिङको गजुरी गाउँपालिका वडा नं. ८ मा रहेको किराञ्चोक माध्यमिक विद्यालय परवाङमा १६ औँ शिक्षक नायक एवं २४ औँ जुनियर तथा युवा रेडक्रस गोष्ठी सुरु भएको छ । नेपाल रेडक्रस सोसाइटी धादिङ जिल्ला शाखाको आयोजनामा गोष्ठी सुरु भएको हो ।

गोष्ठीमा जिल्लाका ६७ वटा विद्यालयबाट जुनियर रेडक्रस तथा युवा रेडक्रस सर्कलका विद्यार्थीहरु र शिक्षक नायकको सहभागिता रहने छ । शुक्रबारबाट सुरु भएको गोष्ठी शनिबार सम्पन्न हुनेछ ।

गोष्ठीको उद्घाटन सत्रमा जिल्ला समन्वय समिति धादिङका प्रमुख नवराज अधिकारी क्षेत्रीको प्रमुख आतिथ्य रहेको थियो भने गजुरी गाउँपालिकाका विभिन्न वडाका वडा अध्यक्षहरु, स्थानीय जनप्रतिनिधिहरु, विभिन्न संघ संस्थाका प्रमुख, प्रतिनिधि लगायत पत्रकारहरुको सहभागिता रहेको थियो ।

कार्यक्रमकै अवसर पारि रक्तदान कार्यक्रमको समेत आयोजना गरिएको थियो । उक्त रक्तदान कार्यक्रममा ८ जना महिला र २२ जना पुरुष गरी ३० जनाले रक्तदान गरेको नेपाल रेडक्रस सोसाईटी धादिङ शाखाका उपमन्त्री नारायण कुमार श्रेष्ठले जानकारी दिनुभएको छ ।