असोज २८ गतेदेखि धादिङमा टि–२० क्रिकेट लिग हुने

धादिङ ०८ असोज
धादिङ जिल्ला क्रिकेट संघले धादिङ टि -२० क्रिकेट लिग आयोजना गर्ने भएको छ । प्रतियोगीता बेनिघाट रोराङ गाउँपालिका स्थित विशालटारको चन्द्रोदय बहुमुखी क्याम्पसको खेल मैदानमा असोज २८ देखि कात्तिक ७ गतेसम्म आयोजना हुने भएको हो ।

धादिङ जिल्लामा रहेको दुई नगरपालिका तथा ११ गाउँपालिका गरि १३ वटै स्थानीय तहबाट जिल्लामा क्रिकेटको नयाँ प्रतिभा उत्पादनको लागि प्रतियोगिताको आयोजना गरिन लागिएको जिल्ला क्रिकेट संघ धादिङका अध्यक्ष दीपेश कंडेलको भनाई छ ।

उनका अनुसार यस वर्षको प्रतियोगितामा पालिका स्तरीय खेलाडीलाई प्राथमिकता दिइनेछ । धादिङ जिल्ला क्रिकेट संघले गत वर्ष प्रथम जिल्ला स्तरीय टी–२० प्रतियोगिता आयोजना गरेको थियो ।

प्रतियोगितामा सहभागि हुने पालिका तथा पुरस्कार राशी लगायत अन्य विषयको टुङ्गो असोज २२ गतेसम्ममा लाग्ने आयोजकले जनाएको छ ।