गजुरी दुर्घटना अपडेट : प्रमुख जिल्ला अधिकारीसँग शुक्रबार वार्ता गर्ने सहमति भएसँगै अवरुद्ध पृथ्वी राजमार्ग खुल्यो

धादिङ ०६ असोज
प्रमुख जिल्ला अधिकारीसँग शुक्रबार वार्ता गर्ने सहमति भएसँगै पृथ्वी राजमार्गको गजुरीमा भएको अवरोध खुला भएको छ । बिहीबार विहान विद्यालय हिँडेका एक बालकलाई बसले ठक्कर दिँदा उनको मृत्यु भएपछि विद्यार्थी र स्थानीयले सडक अवरुद्ध गरेका थिए ।

गजुरी गाउँपालिकाको वडा नम्बर १ गजुरी बजारमा विद्यालय हिँडेका ६ वर्षीय विजय परियारलाई गोरखा जाँदै गरेको बसले ठक्कर दिएको थियो । काठमाडौंबाट गोरखा जाँदै गरेको ग १ ख ४५६५ नम्बरको बसले बाटो काट्दै गर्दा जेब्रा क्रसिङमै ठक्कर दिँदा विजयको घटनास्थलमै मृत्यु भएको थियो । स्थानीय आदर्श माध्यमिक विद्यालयमा कक्षा १ मा अध्ययनरत विजयको मृत्यु भएसँगै स्थानीय र सोही विद्यालयका विद्यार्थीले सडक अवरुद्ध गरेका थिए ।

विद्यार्थी र स्थानीयले लापरवाहीपूर्वक सवारी चलाएको भन्दै उक्त बसमा आगजनीसमेत गरेका छन् । चालकलाई हदैसम्मको कारवाही र मृतकको परिवारलाई उचित क्षतिपूर्तिको माग गर्दै सडकमै शव राखेर करिब ५ घण्टा सडक अवरुद्ध गरिएको थियो ।

धादिङका प्रमुख जिल्ला अधिकारी कृष्णप्रसाद लम्सालका अनुसार शुक्रबार मृतकका परिवार र प्रमुख जिल्ला अधिकारीबीच वार्ता गर्ने र मृतकको परिवारलाई उचित क्षतिपूर्ति दिलाउने सम्बन्धमा सहमति भएसँगै अवरुद्ध राजमार्ग खुलेको हो ।