आरुघाट गाउँपालिका–८ को नवनिर्मित वडा कार्यालय भवन उद्घाटन

गोरखा ०२ असोज
कृष्ण बहादुर लामिछाने
आरुघाट गाउँपालिका वडा नं ८ गोरखाको वडा कार्यालय भवन उद्घाटन गरिएको छ । आईतबार एक कार्यक्रमका बिच गाउँपालिका अध्यक्ष राजु गुरुङले ८ कोठे भवनको उद्घाटन गर्नुभएको हो । करिब १ करोड लागतमा निर्माण भएको उक्त भवन साविकको ५ वटा वडालाई पायक पर्ने गरी बनाइएको हो ।

कार्यक्रममा भवन निर्माणको लागि ५ रोपनी निःशुल्क जग्गादान गर्ने स्थानीय हरि प्रसाद ढकाललाई सम्मान गरिएको थियो । कार्यक्रममा सचेत नागरिक समूहले १६ बुदे रचनात्मक ज्ञापनपत्र आरुघाट गाउँपालिका वडा नं ८ का वडाअध्यक्ष मुरारी खनाललाई बुझाएको छ ।

ज्ञापनपत्रमा वडामा गर्नुपर्ने विकास निर्माणका कार्यहरुलाई समेटिएको स्थानीय रमेश तिमल्सिनाले बताउनुभयो । वडाअध्यक्ष मुरारी खनालको अध्यक्षतामा सम्पन्न कार्यक्रममा गाउँपालिका अध्यक्ष राजु गुरुङको प्रमुख अतिथ्य रहेको थियो भने गाउँपालिका उपाध्यक्ष कल्पना नेपालीको विशेष आतिथ्य रहेको थियो ।