नीलकण्ठ बहूप्राविधिक शिक्षालयलाई कक्षा सञ्चालनको अनुमति, भना कार्यक्रम सुरु

धादिङ २३ श्रावण
धादिङको नीलकण्ठ नगरपालिकाको व्यवस्थापनमा सञ्चालन गर्न लागिएको नीलकण्ठ बहूप्राविधिक शिक्षालयलाई कक्षा सञ्चालनको लागि प्राविधिक शिक्षा तथा व्यवसायिक तालिम परिषदले अनुमति दिएको छ ।

परिषदको श्रावण १२ गतेको निर्णय अनुसार भौतिक पूर्वाधारहरु(कक्षाकोठा, प्रयोगशाला, पुस्तकालय, मानव संसाधन र प्रयोगात्मक अभ्यास) नीलकण्ठ नगरपालिकाले गर्नेगरी डिप्लोमा इन सिभिल इन्जिनियरिङ (स्पेसलाईजेसन इन हाइड्रोपावर) र डिप्लोमा इन अटोमोबाइल इन्जिनियरिङ कक्षा सञ्चालनको अनुमति दिएको हो ।

डिप्लोमा इन सिभिल इन्जिनियरिङका लागि ४८ जना र अटोमोबाइल इन्जिनियरिङका लागि २४ जना कोटा निर्धारण गरिएको छ । शैक्षिक सत्र २०७९/०८० का लागि भर्ना समेत सुरु भएको छ । नीलकण्ठ नगरपालिका कार्यपालिकाको पहिलो बैठकले उपमेयर दिपक विश्वकर्मालाई बहुप्राबिधिक शिक्षालय स्थापनाका लागि जिम्मेवारी दिएको थियो ।

प्राविधिक शिक्षालय संचालन गर्नको लागि वडा नं ४ साविकको खानीगाउँ आधारभूत विद्यालयलाई नीलकण्ठ माविमा मर्ज गरेर उक्त विद्यालयलाई आधार बनाइ नीलकण्ठ बहुप्राविधिक शिक्षालय सञ्चालन गरिने छ । निकट भविष्यमै फार्मेसीको कक्षा पनि सञ्चालनमा आउने उपमेयर विश्वकर्माले जानकारी दिनुभयो । उक्त शिक्षालयमा सीटीइभिटिकै दरवन्दी संरचना अनुसार कर्मचारी तथा शिक्षकहरु रहनेछन् ।

यो सफलता सम्पूर्ण नीलकण्ठ नगरपालिकाका नागरिकहरु र सिंगो जिल्लाबासीको भएको भन्दै विश्वकर्माले यो उपलब्धीले गौरवान्वित बनाएको बताउनु भयो ।