धादिङ अस्पतालमा हैजासंग मिल्दाजुल्दा मौसमी फ्लुहरुका बिरामीको चाप बढ्दै

धादिङ २२ असार

शुक्रराज ट्रपिकल तथा सरुवा रोग अस्पताल टेकुमा उपचारका लागि पुगेका केही व्यक्तिमा हैजाको जीवाणु देखिएपछि हैजा फैलने त्रास बढेको छ । हैजा भिब्रिओ कोलेरा नामक ब्याक्टेरियाको कारण लाग्ने रोग हो । हैजाको मुख्य कारण हो, जथाभावी फालिने फोहोर र प्रदुषित पानी ।

हैजाको जीवाणु मानिसको शरीरमा प्रवेश गरेपछि उक्त जीवाणु विकसित हुन १ देखि २ दिन लाग्छ । गर्मी र वर्षातको समयमा हैजाको जोखिम बढी हुन्छ । मनसुन सक्रिय बन्दै जाँदा आउने बाढीले पानीका स्रोतहरू प्रदुषित बन्छन् र हैजाको जोखिम पनि बढ्छ । बाढीका कारण अधिकांश पानीका मुहान फोहोर हुने भएकाले थप सजग हुनुपर्ने धादिङ अस्पतालका डा.रामचन्द रिजालको भनाई छ ।

स्वास्थ्यकर्मीहरूका अनुसार सुरुमा सामान्य झाडापखाला जस्तै लक्षण देखिए पनि पटकपटक पातलो दिसा हुनु र पानी जस्तै बान्ता हुनु हैजाको लक्षण हो । गर्मी र वर्षातको समयमा पानीको स्रोतमा हैजाको जीवाणु मिसिन पुग्यो भने दुषित पानी र त्यस्तो पानी प्रयोग भएको खाने कुराले मानिसमा यो रोगको सङ्क्रमण हुनसक्ने डा. रिजाल बताउनु हुन्छ ।

समयमै उपचार नपाउँदा केही घण्टामै ज्यान जानसक्ने हैजा जस्तो सरुवा रोगबाट सामान्य सजगता अपनाए पनि बँच्न सकिने डा. रिजालको भनाइ छ ।

यस वर्ष धादिङ अस्पतालमा हैजाको कुनै पनि विरामी पुष्टी नभएता पनि हैजासंग मिल्दाजुल्दा मौसमी फ्लुहरुका बिरामीको चाप भने बढ्दै गएको डा.रामचन्द्र रिजाल बताउनुहुन्छ ।

बुधबार थप दुईजनामा हैजा भेटिएको छ। नयाँ थपिएकासँग अहिलेसम्म २१ जनामा हैजा भेटिएको छ ।

विश्व स्वास्थ्य सङ्गठनको एक अध्ययनअनुसार विश्वभर हरेक वर्ष १३ देखि ४० लाख मानिसमा हैजा देखिने गरेको छ । जसमध्ये २१ हजारदेखि एक लाख ४३ हजार जनाको मृत्यु हुन्छ ।

समयमै उपचार नपाउँदा केही घण्टामै ज्यान जानसक्ने हैजा जस्तो सरुवा रोगबाट सामान्य सजगता अपनाए पनि बँच्न सकिने चिकित्सकहरु बताउँछन् ।