सहिद बेपत्ता तथा द्धन्द्ध पीडित परिवारलाई मासिक ७५०० दिने धादिङको थाक्रे गाउँसभाको निर्णय

धादिङ ११ आषाढ
धादिङको थाक्रे गाउँपालिकाले सहिद, बेपत्ता परिवार, द्धन्द्ध पीडित, घाइते तथा अपाङ्गहरुको जीवन निर्वाहका लागि मासिक ७ हजार ५ सय दिने निर्णय गरेको छ । शुक्रबार सम्पन्न गाउँसभाले उक्त निर्णय गरेको हो । शुक्रबार गाउँपालिका उपाध्यक्ष यन्त्र बहादुर थापाले गाउँ सभामा पेस गरेको कुल ९२ करोड २८ लाख ११ हजार बजेट सभाले सर्वसम्मत पास गरेको छ ।

वजेटमा आर्थिक विकासतर्फ ८ करोड १९ लाख ४० हजार विनियोजन गरिएको छ । सामाजिक विकासतर्फ ३२ करोड २९ लाख ६० हजार विनियोजन गरिएको छ ।

पूर्वाधार विकासतर्फ ३९ करोड ३६ लाख १६ हजार बजेट विनियोजन गरिएको छ । यस्तै कार्यालय तथा प्रशासनिकतर्फ ९ करोड ५० लाख, अन्तरसम्बन्धित क्षेत्रतर्फ २ करोड ९२ लाख ९५ हजार बजेटमा समेटिएको छ ।

थाक्रेमा माओवादी जनयुद्धको क्रममा अनिता सुवेदी, विन्दा सुवेदी, इश्वर बस्नेत, किशोर बस्नेत, कमल ढकाल, रमेश कार्की र किल सुवेदीले सहादत प्राप्त गरेका थिए भने इन्द्रबहादुर आचार्य, नवराज आचार्य, हरिशरण थापा, श्याम रुपाखेती दिपक सुवेदी र गोपाल मिजार वेपत्ता छन् ।