गुरु पूर्णिमा तथा व्यास जयन्तीको अवसर पारी आमाको माया छात्राबासमा वृक्षरोपण कार्यक्रम सम्पन्न

धादिङ ३१ आषाढ
गुरु पूर्णिमा तथा व्यास जयन्तीको अवसर पारी आमाको माया छात्राबासमा मङ्गलबार वृक्षरोपण कार्यक्रम सम्पन्न भएको छ । जनजाती कल्याण आश्रम नेपालद्धारा सञ्चालित छात्राबासमा धादिङ लगायत देशका विभिन्न जिल्ला करिब ३० जना असहाय, टुहुरा छात्रहरु बस्दै आएका छन् । छात्रबासका अध्यक्ष डा. नवीनवन्धु पहाडीको अध्यक्षतामा भएको कार्यक्रममा प्रदेश सांसद डा. राजाराम कार्कीको प्रमुख आतिथ्यता रहेको थियो । कार्यक्रममा पर्यावरण अभियन्ता भुमिरमण नेपाल, गङ्गादत्त तिमल्सेना, राजेन्द्र राना मगर, रेडियो बिहानीका स्टेशन म्यानेजर सञ्जय देवकोटा, व्यवसायी सुवास बस्याल, धादिङ सोसियल भोलेन्टिएर ग्रुपका सदस्यहरु, साहित्यकार, स्थानीय बुद्धिजीविहरुको उपस्थिति रहको थियो ।

कार्यक्रममा स्वागत मन्तव्य राख्दै गङ्गादत्त तिमल्सेनाले व्यास ऋषि भगवानको १७ औँ अवतारको रुपमा रहेको र उनले वेदलाई ४ भागमा विभाजन गरी सबैले बुझ्ने सरल र सहज बनाइदिएको र नैतिक शिक्षाको रुपमा विकास भएको बताउँनु भयो ।

प्रमुख अतिथि डा. राजाराम कार्कीले १० हजार २ सय वर्ष अगाडि लेखिएको वेदको महत्त्व अत्यन्तै रहेको बताउँदै वेदका अनुसार मानव जीवनको ब्रह्मचारी अवस्था, गृहस्थ अवस्था, वानप्रस्थ अवस्था, सन्यास अवस्था गरी ४ अवस्था हुने बताउँदै संस्कृत भाषा हाम्रो जननी भएकाले भुल्न नहुने यसलाई विकास गर्दै लानुपर्ने बताउनु भयो । डा. कार्कीले छात्रबासमा १ महिनाको सम्पूर्ण खर्च आफूले व्यक्तिगत रुपमै व्यहोर्ने प्रतिबद्धता जनाउँदै सांसद विकास कोषबाट आवश्यक सहयोग गर्ने वचन बद्धता जनाउनु भयो ।

कार्यक्रममा १ सय ५० भन्दा बढी विभिन्न फलफूल तथा बोट विरुवा छात्रबास वरिपरि रोपिएको छ । कार्यक्रमकै अवसर पारी धादिङ सोसियल भोलेन्टिएर ग्रुपले वाटर डिस्पेन्सर समेत सहयोग गरेको थियो ।