बेनिघाट रोराङमा मेरो जित पक्का छः कृष्ण ब. थपलिया(बिबेक)

धादिङ २० वैशाख
स्थानीय तह निर्वाचनका लागि धादिङको बेनिघाट रोराङ गाउँपालिका अध्यक्ष पदका उम्मेद्वार कृष्ण बहादुर थपलिया(बिबेक) बेनिघाट रोराङबासीबिच लोकप्रिय पात्र हुन् । १० वर्षे माओवादी जनयुद्धको क्रममा आफ्नै परिवारका बुबा, दाजु र भाइ गरी ३ सदस्यलाई गुमाएका विबेक आफू पनि जनयुद्धका कुशल सिपाही हुन् ।

माओवादी शान्तिपूर्ण राजनीतिमा आएपछि आम बेनिघाट रोराङबासीको हरेक समस्यामा मल्हमपट्टी बनेर जनताको काममा दिनरात नभनी निरन्तर लागि रहने बिबेक यतिबेला चुनावी महासंग्राममा होमिएका छन् । पहिलो स्थानीय तह निर्वाचनमा नै अध्यक्षको बलियो दाबेदार रहेका विबेकले अन्तिम समयमा आएर टिकट पाएका थिएनन् ।

सत्ता गठबन्धन दल माओवादी केन्द्रबाट अध्यक्षको टिकट पाएका विवेकले आफू गरिब र किसान परिवारबाट आएकाले गरिब र किसानहरुको वास्तविक समस्या आफूले महसुस गरेको र निर्वाचित भएपश्चात उनीहरुकै निम्ति काम गर्ने प्रतिबद्धता समेत व्यक्त गरेका छन् । राजनैतिक दलहरुले जनतामा झुटो आश्वासन बाढ्ने काम गरेकोले आम नागरिकहरुमा राजनीतिप्रति वितृष्णा बढेको महसुस गर्दै विवेक जनतामा आश्वासन बाढ्ने भन्दा पनि वास्तविक गरिब र किसान तथा मजदुरको पक्षमा आफूले काम गरेर देखाउने बताउनु हुन्छ ।

बेनिघाट रोराङ गाउँपालिकाका हरेक वस्ती बस्तीमा आफू परिचित रहेको र त्यहाँका अल्पसंख्यक तथा गरिबीको रेखामुनी रहेका चेपाङ समुदायको वास्तविक समस्या हल गर्न आफूले पहिलाबाट नै पहल गरिरहेकोले आम नागरिकको माया र विश्वास आफूमा रहेको बताउदै बिबेकले आफ्नो जित सुनिश्चित जस्तै रहेको दाबी समेत गर्नुभयो ।

विवेकको राजनैतिक इतिहास

धादिङको बेनीघाट–रोराङ गाउँपालिका ७– साबिक धुषा गाविसमा जन्मिएका विवेक जनयुद्धको क्रममा राज्य पक्षबाट आफ्ना पिता, दाइ र भाइ मारिएपछि १२ वर्षकै उमेरमा राजनीतिमा होमिएका थिए । भरखरै किशोर अवस्थामा प्रवेश गर्दै गर्दा आफ्ना पिता, दाजु र भाइ गुमाउनु पर्दाको पीडाले राज्यप्रति विद्रोहको भाव उनको मनमा पैदा भयो । आफ्नो परिवार गुमाउनुपर्दाको पीडा र शोकलाई शक्तिमा बदल्दै उनी आफू पनि २०५४ सालबाट जनयुद्धमा होमिए ।

युद्ध चर्किदै जादा देशमा संकटकाल लागु भयो । देशको आमूल परिवर्तनका निम्ति ज्यानको बाजि राखेर युद्धमा होमिएका बिबेक सुरुमा राज्यले परिवारमाथि गरेको हमला विरुद्ध प्रतिकारमा माओवादी बने । बिस्तारै माओवाद बुझ्दै गएपछि राज्यको आमूल परिवर्तन र गरिब निमुखाको पार्टी नेकपा(माओवादी केन्द्र) नै हो भन्ने बुझाइका साथ अझ शसक्त रुपमा युद्धमा लामबद्ध भए ।

बन्दुकको गोलीबाट सत्ता प्राप्त हुने माओको सिद्धान्तलाई आत्मसात गर्दै उनले राज्यव्यवस्था परिवर्तन माओवादीले मात्र गर्न सक्द्ध भन्ने बुझे । युद्ध कालमा गाउँ बस्ती टोल टोलमा माओवादको प्रचारप्रसार गर्न होस् या युद्ध समाप्त भएपछि घाउहरूमा मलम लगाउन होस्, जनताको सुख दुःखमा पहिलो नम्बरमा नै हाजिर हुने नाम हो बिबेक । पटक पटक पार्टीभित्रैबाट अवसर पाउन बञ्चित बनेका उनी अविचलित माओवादी आन्दोलनमा होमिइरहे ।

हाल नेकपा(माओवादी केन्द्र)को प्रदेश सचिवालय सदस्य एवं संघीय निर्वाचन क्षेत्र नं. १ को इन्चार्ज समेत रहेका विबेक यतिबेला बेनिघाट रोराङ गाउँपालिकाको अध्यक्षको उम्मेद्वार बनेका छन् । एकीकृत नेकपा समाजवादीसँग तालमेल गरेर चुनावी मैदानमा होमिएका उनी आफू जितको नजिक पुगेको बताउँछन् । अघिल्लो स्थानीय तह निर्वाचनमा नेकपा(माओवादी केन्द्रले गाउँपालिका अध्यक्ष सहित ५ वटा वडामा विजयी भएको उक्त गाउँपालिका माओवादी केन्द्रको राम्रो पकड भएको गाउँपालिकाको रुपमा परिचित छ ।