नीलकण्ठ १२ धादिङका वडा अध्यक्षमाथि हातपात

धादिङ २४ आषाढ
नीलकण्ठ नगरपालिका वडा नं. १२ का वडा अध्यक्ष बाबुराम लम्सालमाथि मङ्गलबार दिउसो हातपात भएको छ । नगरपालिकाका मेयर भिम प्रसाद ढुङ्गानासँगै सडकको अनुगमनमा गएका अध्यक्ष लम्सालमाथि स्थानीय नानीराम रिजाल, दिपक रिजाल, बलराम रिजाल र युवराज रिजालले अभद्र व्यवहार गर्दै हातपात गरेको अध्यक्ष लम्सालले बताउनु भयो । हातपातबाट अध्यक्ष लम्सालको स्टकोट च्यातिएको र टाउकोमा असर परेको छ । खानेपानीको व्यवस्थापनमा अध्यक्ष लम्सालले सबैले खानेपानी खान पाउनुपर्ने बताएपछि उनीहरुले अभद्र भाषा प्रयोग गर्दै ४ जनाले हातपात गरेका थिए । अध्यक्ष लम्सालले दोषीलाई अभद्र व्यवहार गरेको भन्दै हदैसम्मको कारबाही हुनुपर्ने माग राखी जिल्ला प्रहरी कार्यालय धादिङमा उजुरी दिएका छन् । यता मेयर ढुङ्गानाले खानेपानीको विषयमा केही विवाद निस्किएको त्यसलाई मिलाउन खोज्दा हात हालाहालको अवस्था आएकाले आफूले रोक्न धेरै प्रयास गर्दा पनि घटना भएको बताएका छन् । ढुङ्गानाले रेडियो बिहानीसँग कुरा गर्दै घटनाबाट आफू दुःखित भएको र यसलाई दुवै पक्षलाई राखेर मिलाउने कोशिस गरिरहेको बताएका छन्।