तीन महिनापछि भेटियो रुविभ्यालीको पहिरोमा पुरिएकाहरुको शव

धादिङ ०७ वैशाख

धादिङको उत्तरी क्षेत्रमा पर्ने रुविभ्याली गाउँपालिका–१ तिप्लिङको लिङ्जोमा सडक खन्ने क्रममा पहिरोले डोजरसहित पुरिएका दुई जनाको शव तीन महिनापछि फेला परेको छ ।

सडक खन्दै गर्दा माथीबाट चट्टान खसेर डोजरसहित पुरिएका डोजर चालक मकवानपुरको बकैया–२ का पूर्ण बहादुर रुम्बा र रुविभ्याली–१ लिङ्जोका स्थानीय धन भनिने अनिष तामाङको कंकाल मात्रै भेटिएको हो ।

गत पुष २९ गतेको एउटै पहिरोमा पुरिएका सहचालक राजु तामाङको २ दिनपछि नै शव भेटिए पनि डोजर चालक रुम्बा र स्थानीय तामाङ बेपत्ता नै थिए । पहिरोबाट डोजरको पाटपुर्जा निकाल्ने क्रममा दुबै शवको कंकाल मात्रै भेटिएको हो ।

पहिरोमा गुल्टिएर खन्दै गरेको सडक भन्दा तल खोलामा पुरिएको डोजरसँगै दुबै जनाको सडेगलेको शव ‘कंकाल’ एकै ठाउँमा भेटिएको जिल्ला प्रहरी कार्यालय धादिङका फोकल पर्सन (डिएसपी) जागेश्वर भण्डारीले जानकारी दिनुभयो ।

समाचार स्रोत  : पाबिलन्युज