गठबन्धनको बिरोध गर्दै भरतपुरमा काँग्रेसका ५० कार्यकर्ताले दिए राजीनामा 

भरतपुर महानगरपालिका वडा नम्बर १७ का ५० जना काँग्रेस कार्यकर्ताले सामूहिक राजीनामा दिँदै स्वतन्त्र अभियान घोषणा गरेका छन् ।

महानगरपालिका फेरि पनि माओवादीलाई जिम्मा लगाउन लागेको विरोधमा उनीहरूले राजीनामा दिएर अब स्वतन्त्र अभियान चलाउन लागेको बताएका छन् । पूर्व वडाध्यक्ष देवनारायण महतो, पूर्व वडा सभापति प्रकाश कँडेल सहित ५० जना क्रियाशील कार्यकर्ताले सामूहिक राजीनामा दिएका छन् ।

प्रकाश कँडेलको संयोजकत्वमा भएको भेलाले काँग्रेसबाट राजीनामा दिए पनि देश र जनहितको कामका लागि सधैँ उपस्थित रहने निर्णय गरेको छ । केही दिनअघि मात्र भरतपुरका सबै वडा सभापतिहरूको भेलाले महानगरका नेतृत्व माओवादीलाई दिइए मान्य नहुने निर्णय गरेका थिए ।

भरतपुरको मेयर रेणु दाहाललाई छाडिए काँग्रेसबाटै स्वतन्त्र उम्मेदवारी दिने तयारी समेत भइरहेका बेला वडाबाट थालिएको सामूहिक राजीनामालाई अर्थपूर्ण रूपमा लिइएको छ ।