धादिङ बोर्डिङका ३ विद्यार्थीले ल्याए ३.९५ जिपिए/बुधबार विद्यार्थीहरु सम्मानित

धादिङ १८ आषाढ
धादिङ जिल्लाकै उत्कृष्ठ विद्यालय धादिङ आवासीय माध्यमिक विद्यालयले आज एस.इ.इ परीक्षामा सवोत्कृष्ठ जिपिए सहित सफल विद्यार्थीहरुका लागि सम्मान तथा नयाँ विद्यार्थीहरुलाई स्वागत कार्यक्रमको आयोजना गरेको छ । भर्खरै सार्वजनिक भएको एस.इ.इ परीक्षा २०७५ मा धादिङ आवासीय माध्यमिक विद्यालयबाट परीक्षा दिएका ४८ जना विद्यार्थीहरुमध्ये नवीना श्रेष्ठ, सिद्धान्त श्रेष्ठ, अशिम तिवारीले ३.९५ जिपिए ल्याई नीलकण्ठ नगरपालिकाभित्रका विद्यालयहरुमा उत्कृष्ठ विद्यालय बनेको हो । यस्तै नम्रता श्रेष्ठ, सक्षम तिमल्सिना र समीक्षा तामाङले ३.९ जिपिए ल्याएका थिए भने ३.८५ मा पूजा रिजाल, ३.७५ मा प्रिती श्रेष्ठ, ३.७० मा मोहन बहादुर गुरुङ, ३.६५ मा खुसी तामाङ सहित परीक्षामा सम्मिलित ४८ जना विद्यार्थीले नै सर्वोत्कृष्ठ जिपिए ल्याउन सफल भएका थिए ।

बुधबार विद्यालयमा सफल विद्यार्थीहरुलाई सम्मान तथा कक्षा ११ मा नव प्रवेशी विद्यार्थीहरुलाई स्वागत कार्यक्रमको आयोजना गरिएको हो । विद्यालय व्यवस्थापन समिति अध्यक्ष बाबुराम अधिकारीको अध्यक्षतामा भएको कार्यक्रममा प्रदेश नं. ३ का सांसद राजाराम कार्कीको प्रमुख आतिथ्यता, शिक्षा विकास तथा समन्वय इकाई धादिङका प्रमुख अम्बिका प्रसाद आचार्य र नीलकण्ठ नगरपालिका धादिङका उपमेयर मनराज भण्डारीको विशेष आतिथ्यता धादिङ उद्योग वाणिज्य संघका अध्यक्ष रुद्र बहादुर खत्री, विद्यालय सञ्चालक समितिका सदस्यहरु भुपेन्द्र कुमार श्रेष्ठ, ईश्वरी प्रसाद पाण्डे, गोविन्द कुमार श्रेष्ठ, सुरेन्द्र शाह लगायतको आतिथ्यता रहेको थियो ।

कार्यक्रमलाई सम्बोधन गर्दै सांसद कार्कीले विद्यार्थीहरु लगनशील, अनुशासित र मेहनती भएकै कारण आज धादिङ बोर्डिङ स्कुलले यो सफलता हात पारेको बताउँदै भविष्यका राष्ट्र निमार्ताहरुले अझै मेहनतका साथ आफूलाई अध्ययन अध्यापनमा केन्द्रीत गरी समाज सापेक्ष बन्नका लागि अनुरोध गर्नुभयो ।

यस्तै शिक्षा विकास तथा समन्वय इकाई धादिङका प्रमुख अम्बिका प्रसाद आचार्यले एस.इ.इ. एउटा फलामे ढोका हो तर पनि अझै यस्ता फलामे ढोका पार गर्न बाकी रहेकाले विद्यार्थीहरुलाई आफ्नो लक्ष्य अनुरुप लाग्नुपर्ने बताउनु भयो । यस्तै बालबालिकाहरुलाई अभिभावकहरुले धेरै माया दिनुभन्दा पनि उनीहरुलाई स्वाबलम्बी बनाउनतर्फ जोड गर्नुपर्ने बताउनु भयो ।

यसैगरी नीलकण्ठ नगरपालिका धादिङका उपमेयर मनराज भण्डारीले कम जिपिए ल्याउँदैमा आत्तिनु पर्दैन हामीले धेरै बाटाहरुलाई पहिचान गरी पछ्याउन सक्छौँ भन्दै अहिलेका विद्यार्थी नै पछि गएर यो देश हाक्ने रथ बन्न सक्छन । राजनीतिमा पढाई कम भएका भन्दा अब्बल व्यक्तित्व आजको आवश्यकता रहेको कुरा बताउनु भयो ।

विद्यालयका प्रधानाध्यापक हरि लम्सालले बिगतका वर्षहरुमा पनि धादिङ बोर्डिङ जिल्लाको मात्रै नभएर देशकै उत्कृष्ठ विद्यालयका रुपमा स्थापित भइसकेकाले यो नतिजाले पनि विद्यालयलाई अब्बल बनाउन सफल भएकोमा सम्पूर्ण विद्यार्थी, शिक्षक तथा अभिभावकहरुलाई धन्यवाद दिदै भोलिका दिनमा पनि यस्तै नतिजा हासिल गर्दै भविष्य उज्ज्वल पार्न निरन्तर साथ र सहयोगको अपेक्षा गर्नु भयो । आगामी दिनमा विद्यालयको शैक्षिक गतिविधिलाई अझै परिस्कृत र समय सापेक्ष बनाउदै लैजाने प्रतिबद्धता समेत व्यक्त गर्नु भयो ।

कार्यक्रमकै अवसरमा विभिन्न विधामा शिक्षकहरुलाई सम्मान समेत गरिएको थियो । कार्यक्रममा विद्यार्थीहरुले विविध सांस्कृतिक प्रस्तुतिका साथै तेक्वान्दोका विभिन्न कलाहरु पनि प्रस्तुत गरेका थिए ।