होलीलाई मर्यादित बनाउन धादिङ प्रहरीको सुरक्षा व्यवस्था कडा

होली ९फागु० पर्वमा उच्खृंखल गतिविधि रोकेर मर्यादित, शान्तिपूर्ण र सद्भाव कायम गराउन जिल्ला प्रहरी कार्यालय धादिङले सुरक्षा व्यवस्था कडा पारेको छ ।

कोभिड–१९ को जोखिम कायमै रहेका कारण होली पर्व मनाउँदा विशेष सावधानी अपनाउन प्रहरीले सबैलाई आग्रह गरेको छ । कार्यालयले सूचना जारी गरी होली पर्व मनाउने नाममा कोही कसैलाई इच्छा विपरीत रंग नदल्न अनुरोध गरेको छ ।

कोरोना भाइरस फैलनसक्ने अवस्थालाई मध्यनजर गरी सार्वजनिक स्थानहरुमा सभा, सम्मेलन, भोज, भतेर लगायत सार्वजनिक भेला गरेर होली पर्व नमनाउन भनिएको छ । अबिर हाल्ने, लोला हान्ने तथा हो–हल्ला गर्ने कार्य नगर्न साथै जबर्जस्ती अमर्यादित गैरकानुनी र उच्छङ्खल व्यवहार रोक्न जिल्ला प्रहरीले व्यस्त चोकमा प्रहरी समेत परिचालन गरेको जिल्ला प्रहरी कार्यालय धादिङका प्रवक्ता एवम् सूचना अधिकारी प्रहरी नायव उपरीक्षक जागेश्वर भण्डारीले बताए ।

यात्रामा निस्किएका व्यक्तिहरु, बाटोमा हिँडिरहेका महिला तथा बालबालिकाहरुलाई होलीको नाममा दुख दिने, हैरानी दिने गरेको पाइएमा तुरुन्त प्रहरीलाई खबर गर्न आग्रह गरिएको छ ।

रमाइलो गर्ने क्रममा रंग जथाभावी खेल्दा आँखाको दृष्टि गुम्ने, कानको जाली फुट्ने, एलर्जी, दम, छालासम्बन्धी विभिन्न समस्याले सताउन सक्ने भन्दै पर्वलाई मर्यादित रुपमा मनाउन स्थानीयहरूलाई प्रहरीले आग्रह गरेको छ।