टि-२० विश्वकप छनोटको सेमिफाइनलमा नेपाल आज युएई सँग खेल्दै

नेपालले आइसिसी टि-२० विश्वकप छनोट ए को सेमिफाइनल खेलमा आज युएई सँग खेल्दैछ । नेपाल र युनाइटेड अरव इमिरेट्स (युएई) को खेल नेपाली समय अनुसार दिउँसो ३:४५ मा ओमान क्रिकेट एकेडेमीमा हुनेछ ।

नेपाल २०१४ पछि पहिलो पटक विश्वकप खेल्ने सोचमा छ । नेपालले युएईलाई हराए आगमी अक्टोबर – नोभेम्बरमा अष्ट्रेलियामा हुने टि-२० विश्वकप खेल्न पाउनेछ । युएई पनि नेपाललाई हराउँदै विश्वकपमा पुग्न चाहन्छ । यी दुवै टोलीका लागि आजको खेल सबैभन्दा महत्त्वपूर्ण हुनेछ । त्यसैले आज नेपाल र युएईको खेलमा कडा प्रतिस्पर्धा हुने देखिएको छ । अपराजित रहँदै सेमिफाइनल सम्म आएको नेपाली टोली युएईलाई हराउन सक्षम देखिएको छ ।

नेपाल समूह बी को विजेता र युएई समूह ए को उपविजेता हुन् । दोस्रो सेमिफाइनलमा ओमान र आयरल्यान्डबीच प्रतिस्पर्धा हुनेछ । आयरल्यान्ड समूह ए को विजेता र ओमान समूह बी को उपविजेता हुन् भने अपराजित रहँदै सेमिफाइनल खेल्ने नेपाल एक्लो टोली हो ।