दार्खा धादिङमा स्यामा पागा बनाउने तालिम सम्पन्न,महिलाहरु स्वरोजगार बन्दै

धादिङ आषाढ ११
१ महिने स्यामापागा बनाउने तालिम सम्पन्न भएपछि खनियाबास गाउँ पालिकाका महिलाहरु स्वरोजगार बनेका छन् । ग्रामीण प्रबद्धन केन्द्र नुवाकोटको आयोजना र खनियबास गाउँ पालिकाको आर्थिक सहयोगमा सञ्चालित एक महिने स्यामापागा बुन्ने तालिममा खनियाबास गाउँ पालिकाका ५ वटै वडाबाट ५÷५ जना महिलाहरुको सहभागिता रहेको थियो । २५ जना महिलाहरुको सहभागिता रहेको तालिममा स्थानीय दक्ष प्रशिक्षकहरुले प्रशिक्षण दिएका हुन् ।

सात वटा रङ्मा बुनिने र बुद्ध धर्मको धार्मिक मान्यता अनुसार महत्त्वपूर्ण रहेको यस स्यामा पागा महिलाहरुले लगाउने एक पोशाक हो । ग्रामीण प्रबद्र्धन केन्द्र नुवाकोटका अध्यक्ष रामचन्द्र न्यौपानेको अध्यक्षता रहेको समापन कार्यक्रममा खनियाबास गाउँ पालिकाका अध्यक्ष रण बहादुर तामाङको प्रमुख आतिथ्यता, उपाध्यक्ष यो माया तामाङ र प्रमुख प्रशासकीय अधिकृत विष्णु प्रसाद गुरुङको विशेष आतिथ्यता र रेडियो बिहानी ९७.६ मेगाहर्जका स्टेशन म्यानेजर सञ्जय देवकोटाको आतिथ्यता रहेको थियो ।

ग्रामीण भेगमा महिलाहरुलाई स्वरोजगार जीविकोपार्जनतर्फ अग्रसर गराउने कार्यक्रम अत्यन्तै प्रभावकारी रहेको बताउदै गाउँ पालिकाका प्रमुख प्रशासकीय अधिकृत विष्णु प्र्रसाद गुरुङले आगामी आर्थिक वर्षमा यसलाई थप व्यवस्थित बनाउँदै लैजान आफूले थप पहल गर्ने बताउनु भयो ।

दुना टपरी बनाउने तालिम, स्यामा पागा लगायत महिला उद्यमी तालिमहरु पालिकाले सञ्चालन गर्दै आएको बताउँदै गाउँ पालिका उपाध्यक्ष यो माया तामाङले अन्तराष्ट्रिय बजारमा अत्यन्तै माग हुने स्यामा पागाको पालिकामै व्यवसायिक केन्द्र बनाएर स्थानीयले उत्पादन गरेको सामग्री बेच विखन गर्दै यसलाई अझ व्यवस्थित बनाउने बताउनु भयो ।

तामाङ समुदायको धार्मिक र सांस्कृतिक पहिचान बोकेको स्यामा पागालाई अझै व्यवस्थित र व्यवसायिक रुप दिनको लागि गाउँ पालिकाले आगामी आर्थिक वर्षमा बजेटको व्यवस्थ गर्ने बताउँदै गाउँ पालिका अध्यक्ष रण बहादुर तामाङले खनियाबास गाउँ पालिकामा जडिबुटी, अल्लो लगायतका विभिन्न प्राकृतिक सम्भावनाले भरिपूर्ण रहेकाले आगामी आर्थिक वर्षमा अल्लोबाट धागो निकाली कपडा बुन्ने तालिम लगायत जीविको पार्जनका कार्यक्रमहरु सञ्चालन गर्ने बताउनु भयो ।

ग्रामीण प्रबद्र्धन केन्द्र नुवाकोटका कार्यक्रम संयोजक हरि प्रसाद भट्टराईले सञ्चालन गर्नु भएको कार्यक्रमको समापन गर्दै ग्रामीण प्रबद्र्धन केन्द्र नुवाकोटका अध्यक्ष रामचन्द्र न्यौपानेले ग्रामीण प्रबद्र्धन केन्द्र स्थानीय स्तरमा उपलब्ध साधन स्रोतलाई परिचालन र सदुपयोग गरी जीविको पार्जन र आर्य आर्जनमा वृद्धि गर्नका लागि विभिन्न ठाउँमा तालिम सञ्चालन गर्दै आएकाले खनियाबास गाउँ पालिकासँग सहकार्य गर्न पाउँदा खुसी भएको र आगामी दिनमा पनि खनियाबास गाउँ पालिकामा धेरै जडिबुटी र अल्लोको धेरै सम्भावना भएकाले पालिकासँग सहकार्य गरेर काम गर्ने बताउनु भयो ।