बेमौसमी वर्षाका कारण धानबालीमा क्षति पुगेका किसानलाई तत्काल राहत दिन नागरिक समाजको माग

धादिङ २२ पौष
बेमौसमी बर्षाका कारण धानबालीमा क्षति पुगेका किसानलाई क्षतिपूर्ति उपलब्ध गराउन जिल्ला प्रशासन कार्यलय धादिङको ध्यानाकर्षण गराईएको छ । बिहिबार नागरिक समाज धादिङले प्रमुख जिल्ला अधिकारी कृष्ण प्रसाद लम्साललाई ध्यानाकर्षण पत्र बुझाउदै अन्न बालीमा पुगेको क्षतिको वैज्ञानिक मूल्य निर्धारण गरी छिटो भन्दा छिटो राहत उपलब्ध गराउन माग गरिएको छ ।

ध्यानाकर्षण पत्र बुझ्दै प्रमुख जिल्ला अधिकारी लम्सालले स्थानीय तहहरुमा लगत संकलनको कार्यक्रम सञ्चालन भईरहेको तर राहत उपलब्धमा निकै नै ढिलासुस्ती देखिएको र किसानलाई राहत उपलब्ध गराउने विषयमा स्थानीय निकायहरुलाई ताकेता गरेर छिट्टै राहत वितरणको कार्यक्रमलाई सञ्चालन गर्ने प्रतिवद्धता जनाउनु भयो ।

असोज ३१ देखि कार्तिक ५ गतेसम्म भएको बेमौसमी बर्षाका कारण सबैभन्दा धेरै ज्वालामुखी गाउपालिकामा ३६५ जना किसानको धानबालि क्षति भएको छ भने त्रिपुरा सुन्दरी गाउपालिकामा २७२, गजुरी गाउपालिकामा २५०, नीलकण्ठ नगरपालिकामा ११३, सिद्धलेक गाउपालिकामा ३६, धुनिबेसी नगरपालिकामा १७ र थाक्रे गाउपालिकामा १ जना किसानको धानबालिमा क्षति भएको सम्बन्धित स्थानीय तहले जानकारी दिएका छन् ।