ट्रकसँग ठोक्किएर घरभित्रै माइक्रोबस छिर्‍यो

चितवन २३ मङ्सिर
पृथ्वी राजमार्ग अन्तरगत चितवनको फिस्लिङ बजारमा यात्रुबाहक माइक्रोबसलाई मालबाहक ट्रकले ठक्कर दिदा माइक्रो घरभित्र छिरेको छ । बिहिबार बिहान इच्छाकामना गाउँपालिका–३, फिस्लिङ बजारमा उक्त दुर्घटना भएको हो । पछाडीबाट ट्रकले ठक्कर दिएपछि अनियन्त्रित भएको बस सडक छोडेर घरतिर हुत्तिएको हो ।

काठमाडौंबाट अर्घाखाँची जाँदै गरेको माइक्रोबसमा सवार ४ जना सामान्य घाइते भएका छन् । बा ३ ख ८६३० नम्बरको उक्त माइक्रोबसलाई एकै दिशाबाट आएको ना ६ ख ५५०३ नम्बरको ट्रकले पछाडिबाट ठक्कर दिएको प्रहरीले जानकारी दिएको छ ।

बिहानको समयमा फिस्लिङ बजारमा तरकारी खरिद बिक्री गर्नेको ठूलो भिडभाडका कारण पनि दुर्घटनाहरु बढेको स्थानीयको भनाइ छ ।

तस्विर स्रोत : दानबहादुर गुरुङ