धादिङको धुवाँकोटमा गोरु जुधाई, कृषि तथा हस्तकला प्रदर्शनी मेला हुदै, १७ हल गोरु जुधाईने

धादिङ २७ पुस

माघे संक्रान्तिको अवसरमा धादिङको नीलकण्ठ नगरपालिका वडा नं १४ धुवाँकोटस्थित भंगेरीथानमा गोरु जुधाई, कृषि तथा हस्तकला प्रदर्शनी मेलाको हुने भएको छ । संस्कृति संरक्षण तथा पर्यटन प्रवर्द्धन केन्द्र धुवाकोटको आयोजना र नीलकण्ठ नगरपालिकाको सहयोगमा मेला सम्पन्न हुन लागेको हो ।

बुधबार धादिङबेसीमा आयोजित पत्रकार सम्मेलनमा कार्यक्रमको तयारीबारे जानकारी गराएको हो । यस वर्ष धुवाँकोटको भंगेरीमा १७ हल गोरु जुधाइने केन्द्रका अध्यक्ष शिवकुमार श्रेष्ठले जानकारी दिनुभएको छ ।

धुवाँकोटमा परम्परादेखिनै गोरु जुधाइने भएपनि केही समय रोकिएको गोरु जुधाई २०७१ सालदेखि व्यवस्थित रुपमा आयोजना गर्दै आएको श्रेष्ठले बताउनुभयो । गोरु जुधाउनको लागि पहिलो, दोस्रो र तेस्रो समूहमा विभाजन गरिएको छ । गोरुको उमेर, मोटाई र क्षमता हेरेर चार समुहमा विभाजन गरिएको केन्द्रका अध्यक्ष श्रेष्ठले बताउनुभयो ।
।
धुवाकोटमा पर्यटन प्रवर्द्धन तथा स्थानीय कृषि उत्पादनको प्रवर्द्धनमा समेत सहयोग गर्ने उद्देश्यले कार्यक्रमको आयोजना गरिएको केन्द्रका सदस्य सुमन अधिकारीले बताउनुभयो ।

पहिलो समूहमा ३ हल गोरु, दोस्रो समूहमा ६ हल र तेस्रो र चौथो समुहमा ४र४ हल गोरु रहनेछन् । पहिलो समूहको विजेता गोरु धनीले १२ हजार, उपविजेता गोरु धानीले १० हजार नगद पाउनेछन् ।

दोस्रो समूह विजेता र उपविजेताले १० हजार र ८ हजार, तेस्रो समूहले ८ हजार र ६ हजार पाउनेछन् । त्यस्तै चौथो समुहको विजेता गोरुको धनीले ४ हजार र उपविजेता गोरुको धनीले २ हजार नगद पाउने अधिकारीले बताउनुभयो ।

गत वर्ष जस्तै यस वर्ष पनि धादिङ सहित देशैभर गोरु जुधाई तथा बृहत सांस्कृतिक कार्यक्रमको आयोजना गरि माघेसंक्रान्ति पर्व मनाईदै छ ।

बझाङ्गी राजा जयपृथ्वीबहादुर सिंह तारुकामा मामाघर जाँदा उनलाई मनोरञ्जन दिलाउन गोरु जुधाइ मेलाको सुरुवात गरिएको किम्बदन्ति रहेको छ । सिंह विसं १९७८ सालमा नुवाकोटको तारुका९५ चन्दनीस्थित मामाघर आउँदा भानिजलाई मनोरञ्जन दिन उनका मावलीले बाजागाजासहित साँढे जुधाउने परम्परा आयोजना गराएका थिए । यही परम्परा अन्ततः वरपरको गाँउलेहरूको लागि पनि मनोरञ्जनको माध्यम र खेल जात्रा बनेको हो ।