धादिङ अस्पतालमा ३ बेडको आईसियु पुन सञ्चालनमा, छिट्टै ५ बेड सञ्चालन गर्ने तयारी

धादिङ २५ पुस
धादिङ अस्पतालमा ३ बेडको सघन उपचार कक्ष (आईसियु) सञ्चालनमा आएको छ । कोभिडको दोस्रो लहरमा ६ महिना सञ्चालनमा आएपछि बन्द भएको सघन उपचार कक्ष (आइ.सी.यु) आईतबारदेखी पुनःसञ्चालनमा आएको अस्पतालका सूचना अधिकारी विक्रम वि.कले जानकारी दिनुभएको छ ।

आइसियु पुनः सञ्चालनमा आएपछि आईतबार साँझबाट ज्वालामुखी–६ का ४५ वर्षीय नकुल शाक्यले उपचार सेवा लिएको वि.कले बताउनुभयो ।

सूचना अधिकारी वि.कका अनुसार आईसियुको लागि ४ जना मेडिकल अधिकृत र नयाँ दरखास्त आव्हान गरी ६ जना स्टाफ नर्सको व्यवस्था मिलाईएको र विषेशज्ञ चिकित्सकले आवश्यकता अनुसार राउण्ड ड्युटी र अनुकल सेवा दिने छन् । अस्पतालमा छिट्टै ५ बेड सञ्चालन गरिने तयारी भईरहेको अस्पतालका सूचना अधिकारी वि.कले बताउनुभयो ।

क्रिटिकल केयर गर्नुपर्ने गम्भीर स्वास्थ्य समस्या भएका बिरामीहरूलाई न्यूनतम शुल्कमा धादिङ अस्पतालले सेवा प्रदान गर्ने उद्देश्यले आइसियु सञ्चालन गरिएको अस्पताल सञ्चालन तथा व्यवस्थापन समितिका अध्यक्ष राजाराम रिजालले बताउनुभयो ।

अति गरिब र आकस्मिक आइसियु उपचार सेवा प्रदान गर्नुपर्ने बिरामीहरूलाई अस्पताल सञ्चालन तथा व्यवस्थापन समितिले आंशिक वा पूर्ण छुटमा उपचार गरिने अध्यक्ष रिजालको भनाई छ ।