धादिङ अस्पतालद्धारा कोरोनाको नयाँ भेरियन्टको उपचारका लागी स्पेसल टास्क फोर्स गठन

धादिङ ११ पुस 
जिल्ला अस्पताल धादिङले छिमेकी देशमा कोरोना भाइरसको नयाँ भेरियन्ट बिएफ–७ को सङ्क्रमण बढ्दै गएको भन्दै सर्तकता अपनाउन आग्रह गरेको छ ।

अस्पतालले आज (सोमबार) एक कार्यक्रमको आयोजना गरि धादिङ अस्पतालको हालको अवस्था र अस्पतालले गरेको तयारीको विषयमा जानकारी गराएको छ ।

कार्यक्रममा धादिङ अस्पतालका कन्सलटेन्ट जनरल फिजिसियन डा. दिनेश रेग्मीले कोरोनाको नयाँ भेरियन्टको बिषयमा जानकारी गराउनु भएको छ ।

उनले नेपालमा बिएफ–७ भेरियन्ट पुष्टि नभए पनि चीन र भारतमा बढ्दै गएकाले खुला सिमाना र आवतजावतका कारण जोखिम रहेको भन्दै स्वास्थ्य मापदण्डको पालना गर्न अनुरोध गर्नुभएको छ । कोरोनाको पछिल्लो लहर भन्दा बिएफ–७ भेरियन्ट बढि संक्रात्मक रहेको रेग्मीले बताउनुभयो ।

त्यस्तै उनले कोरोनाको सबभेरियन्ट संक्रमण हुन नदिन स्यानिटाइजरको प्रयोग गर्न, नियमितरूपमा साबुनपानीले हात धुने लगायत स्वास्थ्यका सबै मापदण्ड अनिवार्य पालना गर्न र बुस्टर डोज लागाउन छुटेकाहरुले तत्काल लगाउन आग्रह गर्नुभएको छ ।

यसैगरि धादिङ अस्पतालले कोरोनाको नयाँ भेरियन्टको उपचारका लागी डा. दिनेश रेग्मीको संयोजकत्वमा स्पेसल टास्क फोर्स गठन गरेको छ । जसको सदस्यमा डा. रामचन्द्र रिजाल, सुचना अधिकारी बिक्रम वि.क., लेखा प्रमुख बिष्णु चापागाई, सामाजिक सेवा ईकाई प्रमुख कृष्णलाल उप्रेती, सोनु कोजु, बिमला महरा, श्याम गोम्जा, अनु हौंमिखा रहेका छन् ।

समितिका संरक्षकमा धादिङ अस्पताल संचालन तथा ब्यवस्थापन समितिका अध्यक्ष राजाराम रिजाल, निमित्त मेसु मधुकर दाहाल रहेका छन् ।